राम और रावण

Published 17 એપ્રિલ, 2011 by Muni Mitranandsagar (મુનિ મિત્રાનંદસાગર)

राम और रावण एक ही सिक्के के दो पहलू हुआ करते है.
हर इन्सान में कुछ अंश राम के और कुछ अंश रावण के होते हैं.
परिस्थिति जब राम के अनुकूल होती है तब उसमें राम प्रकट होता है और परिस्थिति जब रावण के अनुकूल होती है तब उसमें रावण प्रकट होता है.

શ્રમણ ભગવાન મહાવીર

Published 16 એપ્રિલ, 2011 by Muni Mitranandsagar (મુનિ મિત્રાનંદસાગર)

યુક્તિ અને વિચાર આધારિત આચારના પુરસ્કર્તા શ્રમણ ભગવાન મહાવીર
જન્મ કલ્યાણક પ્રસંગે શ્રમણ ભગવાન મહાવીરને વંદના

શ્રમણ ભગવાન મહાવીરનું નામ પડે એટલે કેટલી બધી વાતો યાદ આવે. ભગવાનની સામે ફૂંફાડા મારતો ચંડકોશિયો નાગ દેખાય. ભગવાનને પાંચ માસ અને પચ્ચીસ દિવસના ઉપવાસનાં પારણાં કરાવતી ચંદનબાળા દેખાય. ભગવાનનાં ચરણોમાં આળોટતા રાજાઓ દેખાય. કુબેરના ખજાના સમી સંપત્તિને છોડીને ભગવાનનાં ચરણોમાં ફકીરીની અમીરી સ્વીકારતા શાહુકારો દેખાય. પગની પાની સુધી પહોંચતા લાંબા અને કાળાભમ્મર વાળનું સૌન્દર્ય ધરાવતી અપ્સરા જેવી કન્યાઓ ક્ષણભરમાં કેશલોચ કરીને ભગવાનનાં ચરણોમાં સાધ્વીજીવનનો સ્વીકાર કરીને ખુલ્લા પગે વનવગડામાં બાવળની અણીદાર શૂળો વાગવાની ચિંતા કર્યા વિના આત્માની મસ્તીમાં ચાલતી દેખાય. એક તરફ ધન્ના અણગાર જેવા તપસ્વી હોય, બીજી બાજુ પૂણીયા શ્રાવક જેવા સમતાના સાગર હોય. એક તરફ બાળક અતિમુક્ત હોય, તો બીજી તરફ બાળક જેવા ગૌતમસ્વામી હોય! સ્વભાવથી સરળ અને જ્ઞાનથી મહાન એવા ગૌતમસ્વામી એક નાના બાળકની જેમ ભગવાનને સવાલો પૂછતા હોય, ઘણીવાર તો એમના સવાલો પણ નાના બાળક જેવા જ હોય! અને ભગવાન મહાવીર પૂરી ગંભીરતાથી એના ઉત્તરો આપતા હોય.

આ બધાં દૃશ્યો ભગવાન મહાવીરના સ્મરણે તાજાં થાય છે. ક્ષત્રિયકુંડના રાજસિંહાસનને છોડીને આમજનતાના હૃદયસિંહાસન ઉપર બેસનારા ભગવાન મહાવીરે માત્ર ત્રણ દાયકાના ટૂંકા ગાળામાં સમગ્ર ભારતવર્ષની વૈચારિક કાયાપલટ કરી એ બનાવ વેદકાળના આરંભથી લઈને અત્યાર સુધીનો સૌથી મોટો ચમત્કાર છે. ‘એક હાથમાં ધર્મગ્રન્થ અને બીજા હાથમાં હથિયાર’ જેવી જબરજસ્તીથી નહીં પરંતુ એક આંખમાં કરુણા અને બીજી આંખમાં પ્રેમના પારાવાર જેવી સલૂકાઈથી ભારતવર્ષના ઘડવૈયાઓમાં ઊંચું અને આદરભર્યું સ્થાન પામેલા ભગવાન મહાવીરે જે ધર્મપ્રવર્તન કર્યું એમાં ‘માત્ર મારા શરણે આવ, મારા ધર્મનો સ્વીકાર કર’ એમ કહેવાના બદલે ‘તને ઠીક લાગે તેનો સ્વીકાર કર.’ એ વિચારને કેન્દ્રમાં રાખ્યો. દશવૈકાલિક નામના જિનાગમમાં ‘જં સેયં તં સમાયરે’ એ શબ્દો દ્વારા ભગવાન મહાવીરનો આ સિદ્ધાંત સચવાયેલો છે. વિચારની આઝાદી સાથે આચારની નિર્મળતાનો આ એક અજોડ દાખલો છે.

અન્ય ધર્મગ્રન્થો જ્યારે હિંસા અને બલિદાનો દ્વારા ભગવાનને ખુશ કરવાની વાતો કહેતા હતા ત્યારે ભગવાન મહાવીરે અહિંસા દ્વારા આત્માને પ્રસન્ન કરવાની વાત કરી. હર્ષ-શોકથી ઘેરાયેલા ભગવાનના બદલે રાગ-દ્વેષમુક્ત ભગવાનનો વિચાર તેમણે જગતને આપ્યો. જગતના સર્જન, વિસર્જન, પાલન, પોષણની જવાબદારીવાળા ઈશ્વરના બદલે જગતને માર્ગ બતાવનારા ઈશ્વરનો જગતને પરિચય આપ્યો. ઉપરથી નીચે આવનારા ભગવાનના બદલે નીચેથી ઉપર જનારા ભગવાનની વાત કરી. જે પોતે મુક્ત હોય તે જ બીજાને મુક્તિનો માર્ગ બતાવી શકે અને જે પોતે બુદ્ધ હોય તે જ બીજાને બોધના રસ્તે લઈ જઈ શકે એ આદર્શ વિચારની ભગવાન મહાવીરે સ્થાપના કરી.

‘માનવમાત્ર મોક્ષને પાત્ર’નો ભગવાન મહાવીરે આપેલો મંત્ર એટલો મહાન પૂરવાર થયો કે જાતિ આધારિત જ્ઞાન તેમજ જાતિ આધારિત ધર્મની ધારણાના ભુક્કા બોલાઈ ગયા અને જાતિ આધારિત ભેદભાવવાળી અનેક રૂઢિઓ અને ભ્રમણાઓ એના પાયામાંથી હલબલી ઊઠી. ભગવાન મહાવીરના આ નવપ્રસ્થાનના કારણે તેમના ધર્મસંઘમાં મેતારજ જેવો સમાજના છેવાડાનો માણસ પણ દીક્ષા ધારણ કરીને મહામુનિનો દરજ્જો પામી શક્યો. જે તત્કાલીન અન્ય ધર્મો અને સમાજમાં કદી શક્ય નહોતું. આજના ભારતમાં પણ ક્યાં શક્ય છે!

લોકો સમજી શકે એવી સરળ ભાષામાં ઉપદેશ આપીને ભગવાન મહાવીરે એ યુગમાં અઢારે આલમ માટે ઉપદેશ શ્રવણનાં દ્વાર ખોલી આપ્યાં. ભગવાન મહાવીરના પ્રકાંડ પંડિત શિષ્યોએ પણ પાંડિત્યથી ભરેલું, ક્લિષ્ટ અને ન સમજાય તેવું સાહિત્ય લખવાના બદલે આબાલ-વૃદ્ધ અને ગામડાની અભણ સ્ત્રીઓ સુદ્ધાં સમજી શકે એવી ભાષામાં સાહિત્યનું સર્જન કર્યું. ચાર વેદ અને ચૌદ મહાવિદ્યાઓના પારગામી એવા ઇન્દ્રભૂતિ વગેરે અગિયાર મહાપંડિતો પોતાના ૪૪૦૦ શિષ્યો સાથે જ્યારે ભગવાન મહાવીરનાં ચરણોમાં દીક્ષિત થયા ત્યારે દુનિયાને ભગવાન મહાવીરના આધ્યાત્મિક પ્રભાવની અનુભૂતિ થઈ. આવો આધ્યાત્મિક પ્રભાવ પામતાં પહેલાં ભગવાન મહાવીરને ખૂબ સહન કરવું પડયું હતું.

પોતાના સાધનાકાળ દરમ્યાન ભગવાન મહાવીરને તત્કાલીન ભારતીય સમાજે રંજાડવામાં કંઈ બાકી રાખ્યું નહોતું. અનેક વખત ભગવાન મહાવીરના પ્રાણ લેવાની કોશિશ કરવામાં આવી હતી. તેમની ઉપર જીવલેણ હુમલાઓ કરવામાં આવ્યા હતા. ભગવાન મહાવીરને અનેક વખત તેમની સાધનામાંથી ચલિત કરવાના પ્રયત્નો કરવામાં આવ્યા હતા. તેમને નિર્દોષ ભોજન ન મળે અને એ કારણે તેમને દિવસો સુધી નિરાહાર રહેવું પડે એટલી હદે તેમની સતામણી કરવામાં આવી હતી. કાનમાં કાંટાની શૂળો ખોસી દેવાની ગુસ્તાખી કરનારા લોકો પણ તેમને ભેટી ગયા હતા. આમ છતાં તેમણે અજોડ સમતા દ્વારા સહનશીલતાની પરાકાષ્ઠાનાં દર્શન કરાવ્યાં હતાં.

ભગવાન મહાવીરે પોતાના ઉત્કૃષ્ટ તપોમય આચરણ દ્વારા સામે ચાલીને પોતાની જાતને જાત જાતની આકરી પરીક્ષાઓમાંથી પસાર કરી હતી. ભટ્ઠીમાં તપેલું સોનું જેમ વધુ નિર્મળ થઈને બહાર આવે તેમ ભગવાન મહાવીર દરેક પરીક્ષાઓમાંથી વધુ ને વધુ નિર્મળ થઈને બહાર આવતા હતા. આવી નિર્મળતાની ચરમસીમાએ તેઓ કેવળજ્ઞાન અને કેવળદર્શનની અણમોલ આત્મિક સંપદાને પામી શક્યા હતા.

ભગવાન મહાવીરે પોતાના અંગત આચરણ માટે બહુ આકરા માપદંડો નક્કી કર્યા હતા. તેઓ પોતાની જાતને કેવી આકરી કસોટીમાં મૂકવાનું સાહસ કરી શકતા હતા અને તેમાંથી કેવી અપૂર્વ સમતા અને મક્કમતા સાથે પસાર થઈ શકતા હતા એનો એક જ દાખલો કાફી થઈ પડશે.

સાધનાકાળમાં ભગવાન મહાવીર એકવાર મેંઢીયગ્રામથી કૌશાંબીનગરી તરફ જઈ રહ્યા હતા એ વખતે એમણે પોતાની જાતને એક બહુ આકરી અને લગભગ પાર ન પડી શકે તેવી કસોટીમાં મૂકવાનો નિર્ણય કર્યો. આ નિર્ણય શરતી ભિક્ષા સાથે સંકળાયેલો હતો. જૈન પરિભાષામાં આને અભિગ્રહ કહે છે. એ અભિગ્રહમાં તેમણે ભિક્ષા ગ્રહણ કરવા માટે દ્રવ્ય, ક્ષેત્ર, કાળ અને ભાવની વિશિષ્ટ શરતો આવરી લીધી હતી. એ શરતો આ રીતની હતી :

  1. દ્રવ્યથી અડદના બાકળાની ભિક્ષા મળે તો જ લેવી, એ બાકળા પણ પાછા સૂપડાના ખૂણે હોય તો જ લેવા,
  2. ક્ષેત્રથી આપનાર વ્યક્તિનો એક પગ ઊંબરાની અંદરની બાજુએ અને બીજો પગ ઊંબરાની બહારની બાજુએ હોવો જોઈએ,
  3. કાળથી ગોચરીની — ભિક્ષા લેવા જવાની — વેળા પતી ગઈ હોવી જોઈએ અને
  4. ભાવથી કોઈ રાજકન્યા દાસત્વને પામી હોય, તેનું મસ્તક મૂંડેલું હોય, તે શરીરે બંધનગ્રસ્ત અવસ્થામાં હોય, તેણે ત્રણ દિવસથી કંઈ ભોજન ન કર્યું હોય, તે રુદન કરતી હોય, તે મને ભિક્ષા આપે તો લેવી.

આવી કપરી શરતો ભિક્ષા માટે નક્કી કરવી અને સ્વાભાવિક રીતે જ તેની કોઈને જાણ પણ ન થવા દેવી એ બહુ આકરી પરીક્ષા છે.

આવા અભિગ્રહ પછી ભગવાને કૌશાંબીનગરીમાં વિચરવાનું ચાલુ રાખ્યું. તેઓ નિયમિત ગોચરી લેવા જતા પરંતુ તેમના અભિગ્રહ મુજબની ગોચરી તેમને મળતી નહીં. ભિક્ષા વિના જ પાછા ફરીને તેઓ તે દિવસે ઉપવાસ કરીને ધ્યાનની મસ્તીમાં ખોવાઈ જતા. આમ ને આમ પાંચ મહિના અને પચ્ચીસ દિવસ નિર્જળા ઉપવાસમાં વીતી ગયા ત્યારે વસુમતી નામની રાજકુમારી જે સંયોગવશ દાસત્વને પામી હતી અને પોતાના શેઠના ઘરે ચંદનબાળા તરીકે ઓળખાતી હતી તેના હાથે ભગવાન મહાવીરના આ કઠોર અભિગ્રહનું સમાપન થયું હતું. ચંદનબાળા કેવી રીતે દાસત્વને પામી હતી એ આખો ઇતિહાસ આ તબક્કે અહીં આલેખવો શક્ય નથી. સમયની અનુકૂળતાએ ક્યારેક એ જોઈશું, પરંતુ આ ઘટનામાં ભગવાન મહાવીર પોતે જ પોતાની જાતની કેવી તાવણી કરતા હતા એ સમજવા મળે છે.

ભગવાન મહાવીરના આ અભિગ્રહને પ્રથમ તીર્થંકર આદિનાથથી લઈને અંતિમ તીર્થંકર ભગવાન મહાવીરના ઇતિહાસમાં સૌથી ઊંચા પ્રકારના અભિગ્રહનો દરજ્જો મળ્યો છે.

તપોમય સાધનાપદ્ધતિ, વિચારોની ભૂમિકા ઉપર આચારની સ્થાપના, આંખો મીંચીને કંઈ પણ ન સ્વીકારવાનો પરમ વિવેક, યુક્તિમંડિત વચનોનો આદર, મૈત્રી, પ્રમોદ, કરુણા અને માધ્યસ્થ્ય સભર જીવનશૈલીનો ઉપદેશ, જરૂરિયાતોનું નિયમન, કોઈ પણ જાતિના સ્ત્રી-પુરુષને એક સરખો મોક્ષનો અધિકાર, અન્યના વિચારોમાં પણ સત્યના અંશના સ્વીકારની મહાન ઉદારતા, સંઘર્ષમય જીવનના બદલે સમન્વયવાદી જીવનની ધારણા વગેરે ભગવાન મહાવીરના ધર્મચક્ર પ્રવર્તનનાં અણમોલ રત્નો છે.

આધુનિક જગતના કેટલાક બુદ્ધિજીવીઓ ‘પસંદગીયુક્ત’ માનવ અધિકારોની વાતો કરે છે ત્યારે ભગવાન મહાવીરે અઢી હજાર વરસ પહેલાં ‘જગતના જીવમાત્રને નિરાપદ જીવનના અક્ષુણ્ણ અધિકાર’ની વાત કરી હતી અને પોતાના જીવનકાળમાં આ વાતને જીવી પણ બતાવી હતી.

જેની આંખોમાં પણ હળાહળ ઝેર હતું એવા ચંડકૌશિક જેવા નાગને સન્માર્ગે લાવવા ભગવાન મહાવીર પોતાની જાતને મૃત્યુના મુખમાં પણ લઈ જવા તૈયાર થયા હતા અને તેના આગઝરતા ફૂંફાડાનો પ્રતિકાર પ્રેમઝરતી કરુણાથી કરીને ચંડકૌશિકના અંતરમનને જીતી લઈને તેના જીવનમાં પરિવર્તન લાવીને તેનો નિસ્તાર કરનારા બન્યા હતા.

‘શસ્ત્રો અને હથિયારો વિનાના આ ભગવાન’ના સિદ્ધાંતોના જ પ્રભાવ નીચે ઉત્તરકાળમાં હિંસાવાદી ધર્મોને પણ અહિંસાનાં ગાણાં ગાવા માટે મજબૂર થવું પડયું એ ભગવાન મહાવીરના જીવનની અજોડ સિદ્ધિ છે.

સંઘ બહાર મૂકવા માગણી

Published 12 એપ્રિલ, 2011 by Muni Mitranandsagar (મુનિ મિત્રાનંદસાગર)
વેજલપુરમાં આદિનાથ દાદાના દેરાસરને ધ્વસ્ત કરાવનારાઓને
સંઘબહાર મૂકવા માગણી

ભૂતકાળમાં જેમ કેટલાક જયચંદો અને અમીચંદો આપણા દેશમાં પાક્યા અને પોતાનાં દેશદ્રોહી કાર્યો દ્વારા અમર(!) બની ગયા તે જ રીતે આ યુગમાં પણ ધાર્મિક દેખાવના આંચળા હેઠળ ધર્મની સમજણનો ઠેકો અને ફાંકો ધરાવનાર કેટલાક જયચંદો અને અમીચંદો જૈનધર્મમાં પાક્યા છે. જેમણે માત્ર અને માત્ર પોતાના ઘમંડને પોષવા માટે અને પોતાની ગંદી માનસિકતાનું જાહેર પ્રદર્શન કરવાના ભાગ રૂપે આપણા સર્વકલ્યાણકારી દેરાસર ઉપર હથોડો ઉગામીને આપણા અંતરાત્મા ઉપર કુઠારાઘાત કરીને આપણા ચૈતન્યને લોહીલુહાણ કર્યું છે.

જૂના યુગમાં પરાયા દેશમાં અને પરાયા ધર્મમાં જન્મેલા મૂર્તિવિરોધી બાબરોએ આપણાં હજારો મંદિરો તોડયાં હતાં. હવેના યુગમાં આપણા જ દેશમાં અને આપણા જ ધર્મમાં જન્મેલા ધર્મદ્રોહી, શાસનદ્રોહી બાબરોએ દેરાસર ઉપર હથોડા ઉગામ્યા છે.

આટલેથી નહીં અટકેલા અને દેરાસરને ધ્વસ્ત કરવાથી નહીં ધરાયેલા આ પાપાત્માઓએ પોતાની નાગાઈનું ખુલ્લેઆમ પ્રદર્શન કરતાં આપણા ધર્મના ઝળહળતા પ્રતીક જેવા અને આપણા ધર્મની યશોગાથા દિગ્‌-દિગંતમાં ફેલાવનારા ધર્મચક્રને પણ ખંડિત કરવામાં પોતાનું ગૌરવ માન્યું છે.

આ દ્વારા હું પ્રવર્તમાન જૈન નેતૃત્વને અપીલ કરૂં છું કે આ અમીચંદ અને જયચંદની (made for each other) જોડીને તત્કાલ જૈનસંઘમાંથી બહાર મૂકવામાં આવે.

મુનિ મિત્રાનંદસાગર
વેજલપુર, અમદાવાદ
મંગળવાર, તા. ૧૨ એપ્રિલ ૨૦૧૧.

તફાવતની કલ્પના કરો

Published 12 એપ્રિલ, 2011 by Muni Mitranandsagar (મુનિ મિત્રાનંદસાગર)

દેરાસર તોડાવનારા (અને તોડનારા) દંભી કાયદાપ્રેમીઓ વિચાર કરે.
દેરાસરના બદલે અન્ય ધર્મસ્થળ તોડી પડાયું હોત તો ખબર છે શું થયું હોત?

દેરાસરના બદલે અન્ય ધર્મસ્થળ તોડી પડાયું હોત તો ખબર છે શું થયું હોત?

મેરા ભાજપા શાસન મહાન !

Published 11 એપ્રિલ, 2011 by Muni Mitranandsagar (મુનિ મિત્રાનંદસાગર)

પોલીસની રહેમનજર નીચે દારૂના અડ્ડા, વ્યભિચાર અને જુગારનાં ધામ ચલાવો તો વાંધો નહીં, બાકી તમારાથી તમારા કાયદેસરના દેરાસરનું સંચાલન ન જ કરાય.

મેરા ભાજપા શાસન મહાન !

મેરી ગુજરાત પોલીસ મહાન !

મેરી હપ્તા સિસ્ટમ મહાન !

અમદાવાદ મ્યુનિસિપલ કોર્પોરેશનનાં ત્રણ વાંદરાં

Published 10 એપ્રિલ, 2011 by Muni Mitranandsagar (મુનિ મિત્રાનંદસાગર)

અમદાવાદ મ્યુનિસિપલ કોર્પોરેશનનાં ત્રણ વાંદરાં

અમદાવાદ મ્યુનિસિપલ કોર્પોરેશનનાં ત્રણ વાંદરાં :

જેઓ જૈનધર્મ સિવાયનાં ગેરકાયદે બંધાયેલાં (૧૬૦૦ — એક હજાર છસ્સો) ધર્મસ્થળો જોતાં નથી, એ વિષે તેઓ વાત કરતાં નથી અને એ વિષે કશું સાંભળવાનો તો તેમની માટે પ્રશ્ન જ પેદા થતો નથી.

અમદાવાદ મ્યુનિસિપલ કોર્પોરેશનનાં તઘલખી કારનામાં

Published 8 એપ્રિલ, 2011 by Muni Mitranandsagar (મુનિ મિત્રાનંદસાગર)

અમદાવાદના વેજલપુરમાં જૈન દેરાસર તોડી પાડવા બદલ કોર્પોરેશનના બાબર બ્રાન્‍ડ (બે)જવાબદાર અધિકારીઓને તત્‍કાલ સસ્‍પેન્‍ડ કરો

કોર્પોરેશનમાં ચૂંટાયેલા જૈન કાઉન્‍સીલરો આ તઘલખી ઘટનાના વિરોધમાં રાજીનામાં આપે

અમદાવાદ મ્યુનિસિપલ કોર્પોરેશનનું ‘શેમ શેમ’

ગુજરાતના ન્‍યાયતંત્રે દેરાસરનું તોડકામ ચાલુ હતું એ દરમ્‍યાન જ દેરાસર પાડવા સામે ‘સ્‍ટે’ આપીને કોર્પોરેશનનું અને ભાજપા શાસનનું નાક વાઢી લીધું છે. દેરાસરે કોર્પોરેશનને સવિનય વિનમ્ર વિનંતી કરી હતી કે ન્‍યાયતંત્રનો ચુકાદો આવે ત્‍યાં સુધી થોભી જાવ. ન્‍યાયાલય જે કોઈ પણ ચુકાદો આપશે તે અમે માથે ચડાવીશું. પણ સત્તાના ઘમંડમાં ચૂર સરકારી ઓફિસરોએ પોતાનું ધાર્યું કરવામાં પોતાનું હિત જોયું. અંતે તેમને નીચા પડવાનો વખત આવ્‍યો છે. વાર્યા ન માને તે હાર્યા માને તે આનું નામ.

દેરાસર પાડવા અંગેની મેટર બાબતે દેરાસર પક્ષ ન્‍યાયતંત્ર પાસે અપીલમાં ગયું હોવાથી મેટર સબજુરીસ હોવા છતાં કોર્પોરેશને ધરાર જૈનધર્મનું કાયદેસર બાંધકામવાળું દેરાસર તોડી પાડયું તે બદલ કોર્ટનો અનાદર કરવાના ગુનામાં દોષિત ઠરાવીને કોર્પોરેશનના જવાબદાર અધિકારીઓને સસ્‍પેન્‍ડ કરવા ગુજરાત સરકાર પાસે માગણી કરીએ છીએ.

કોર્પોરેશનને શક હતો જ ન્‍યાયતંત્ર દેરાસર તોડવા સામે ‘સ્‍ટે’ આપશે માટે જ ત્રણ દિવસ વહેલું દેરાસર તોડી પાડવાનું નક્કી કરીને તેણે હિરો બનવાની કોશિશ કરી છે. સિંગલ જજના મૌખિક આદેશની મુદદ તો તા. ૧૧ એપ્રિલે પૂરી થતી હતી. તો આટલી બધી ઉતાવળ કોના ઇશારે થઈ અંગે સરકાર કોર્પોરેશનનો જવાબ માગે.

નવરાત્રિના પવિત્ર દિવસોમાં દેરાસર તોડી પાડીને કોર્પોરેશન શું સાબિત કરવા માગે છે તે સમજવું મુશ્‍કેલ છે.

કોર્પોરેશનના બાબરછાપ અધિકારીઓ સામે અનધિકાર ચેષ્‍ટા કરવા બદલ સખત કાર્યવાહીની જૈન સમાજ માગણી કરે છે.

દેરાસર પક્ષને સાંભળ્‍યા વગર અને તેને કોઈ ખુલાસો કરવાની તક આપ્‍યા વિના જ સિંગલ જજની બેંચે કેવી રીતે દેરાસર તોડી પાડવાનો મૌખિક ઓર્ડર કર્યો એ અંગે ઊંડી તપાસ કરવાની સર્વોચ્‍ચ ન્‍યાયતંત્ર પાસે અરજ ગુજારીએ છીએ. આવા એકતરફી ઓર્ડરના કારણે શાંતિપ્રેમી જૈન પ્રજાને ભારે આઘાત લાગ્‍યો છે અને ન્‍યાય મેળવવાના તેના બંધારણીય અધિકાર પર તરાપ વાગી છે.

હવે પછીની ચૂંટણીઓમાં બીજેપીને ખોબેખોબા વોટ આપતાં પહેલાં જૈનો લાખ વાર વિચાર કરે.

પ્રિન્‍ટ અને ઇલેક્‍ટ્રોનિક મિડિયા કોર્પોરેશન પાસે જવાબ માગે કે વેજલપુરમાં કુલ કેટલાં ગેરકાયદે બાંધકામો છે અને તે બાબતે આજ સુધી તેણે શું કર્યું છે. જ્‍યાં આ તોડી પડાયેલું દેરાસર આવેલું છે તેની આસપાસ ગેરકાયદે બાંધકામ હોવાની અરજીઓ કોર્પોરેશનને મળી છે કે કેમ? અને મળી હોય તો તેણે અત્‍યાર સુધી શું કર્યું તેનો હિસાબ આપે.

શું જૈન દેરાસરો માટે જુદો કાયદો અને અન્‍યો માટે જુદો કાયદો એવી કોઈ વિચારધારામાં કોર્પોરેશન માને છે?

જૈન નેતાઓ અને જૈન પ્રજા ઇસ્‍લામ અને શીખ ધર્મના અનુયાયીઓ પાસેથી ધર્મરક્ષા અને સ્‍વરક્ષાના પાઠ નહીં શીખે ત્‍યાં સુધી તેઓ આ દેશમાં ઘમંડી સત્તાધારીઓના હાથે માર જ ખાતા રહેશે. નમાલી અહિંસા એ કાયરતાની મોટી બહેન છે. જૈનો કાયરતા ખંખેરીને ખોટાને ખોટું કહેતાં શીખે એ સમયનો તકાજો છે. એમાં કોઈ નેતાની ભુરકીથી અંજાઈ જઈને પરવશ બનીને જીવવાની જરૂર નથી. હક્ક અને ન્‍યાયની વાત હોય ત્‍યાં વ્‍યાપારી દૃષ્‍ટિકોણવાળી વિચારધારા ન જ ચાલે અને કોઈ પક્ષ પ્રત્‍યેની કાયમી પ્રતિબદ્ધતા પણ ન જ ચાલે.

માનનીય શ્રી રાકેશભાઈએ કોર્પોરેશનના આ તઘલખી પગલાના વિરોધમાં તત્‍કાલ ધારાસભ્‍ય પદેથી રાજીનામું આપી દેવું જોઈએ. તેમણે યાદ રાખવું જોઈએ કે તેઓ પહેલાં જૈન છે અને પછી ધારાસભ્‍ય છે. તેઓ જ્‍યાં સુધી આવો જુલાબ નહીં આપે ત્‍યાં સુધી સત્તાધારીઓની સાન ઠેકાણે આવશે નહીં. કોર્પોરેશનમાં ચૂંટાયેલો એકેએક જૈન કાઉન્‍સીલર આ અન્‍યાયી અને રાક્ષસી તંત્રમાંથી રાજીનામું આપીને પોતાનો વિરોધ દર્શાવે.

નિવેદક : મુનિ મિત્રાનંદસાગર
વેજલપુર, અમદાવાદ
તા. ૮ એપ્રિલ, ૨૦૧૧.